پاۆلوداردا جاپپاي توبەلەس بولدى. ونى ۇيىمداستىرعان تۇرعىنداردىڭ كىم ەكەنى انىقتالدى, دەپ حابارلايدى Egemen.kz جەرگىلىكتى باسىلىمعا سىلتەمە جاساپ.
وقيعا قامزين كوشەسىندە بولعان. توبەلەستى كۋاگەرلەر ۇيالى تەلەفونعا ءتۇسىرىپ العان. كەيىن ۆيدەو Telegram-داعى ارنالاردىڭ بىرىندە تارادى.
جاريالانعان كادرلاردا ءبىر توپ جىگىتتەر جول بويىندا توبەلەسكەنىن كورۋگە بولادى. وبلىستىق پوليتسيا دەپارتامەنتى ءباسپاسوز قىزمەتىنىڭ مالىمەتىنشە, قوڭىراۋ تۇنگى ساعات 01:00-دە تۇسكەن. جاپپاي توبەلەسكە قاتىسقان 22 جاستان 36 جاسقا دەيىن ەر ادامدار انىقتالىپ, پوليتسيا بولىمشەسىنە جەتكىزىلدى.
- تەكسەرىس جۇرگىزىلىپ جاتىر. ولاردىڭ ارقايسىسىنىڭ ارەكەتتەرىنە قۇقىقتىق باعا بەرىلەدى. توبەلەستە كامەلەتكە تولماعاندار بولماعانى انىقتالدى, - دەپ حابارلادى دەپارتامەنت.
توبەلەسكە بارلىعى ونعا جۋىق ادام قاتىسقان, ولاردىڭ جەكە باسى انىقتالدى.